Lögreglan á höfuðborgarsvæðinu hafði í nógu að snúast í gærkvöldi og nótt er fram kemur í dagbók lögreglu.
Lögregla stöðvaði sjö ökumenn í gærkvöldi og nótt vegna gruns um akstur undir áhrifum áfengis eða fíkniefna. Þrír voru stöðvaðir vegna gruns um akstur án ökuréttinda.
Þá var tilkynnt um innbrot í Laugardalnum klukkan rúmlega tvö í nótt. Í dagbók lögreglu segir að húsráðandi hafi komið heim og þá komið að innbrotsþjófi inni í íbúðinni. Reyndi húsráðandi þá að handsama manninn og kom til átaka á milli þeirra. Innbrotsþjófurinn komst undan en skildi símann sinn eftir á vettvangi. Skömmu síðar hafði lögregla uppi á manninum sem svaraði lýsingu húsráðandans og reyndist hann vera eigandi símans. Maðurinn var drukkinn og vistaður í fangageymslu lögreglu. Hann mun ekki hafa stolið neinu.
Lögregla handtók þá mann í Bústaðahverfi laust fyrir átta í gærkvöldi. Sá var grunaður um eignaspjöll en fór ekki að fyrirmælum lögreglu við handtöku. Maðurinn var vistaður fyrir rannsókn máls í fangageymslu lögreglu.
Tilkynnt var um partýhávaða úr íbúð í Grafarvogi rétt eftir miðnætti, þar voru ætluð fíkniefni haldlögð og gestum gert að yfirgefa vettvang er fram kemur í dagbók lögreglu.