Braut rúðu á bráðamóttökunni í nótt – Popp brann í Kópavogi

Nóttin var róleg samkvæmt dagbók lögreglunnar á höfuðborgarsvæðinu. Maður braut rúðu á bráðamóttökunni og íbúð var reykræst eftir að popp brann við.

Lögreglan á höfuðborgarsvæðinu hafði afskipti af manni í nótt en hann hafði brotið rúðu á bráðamóttökunni. Maðurinn var í annarlegu ástandi.

Þá hafði lögreglan einnig afskipti af aðila sem var snarfullur í miðbænum. Sökum ástandsins var viðkomandi fluttur á slysadeild.

Einnig var manni komið í skjól í vesturbænum þar sem hann var stútungsfullur og gat ekki valdið sér.

Reykræsta þurfti íbúð í Kópavogi eftir að popp brann við.

Aukreitis var aðili handtekinn í miðbænum og vistaður í fangaklefa vegna líkamsárásar.