Bifreið valt á Heiðmerkurvegi í gærkvöldi. Kalla þurfti til tækjabíl frá slökkviliði og sjúkrabíl en ekki eru skráð að slys hafi orðið á fólki. Bíllinn var fluttur á brott með dráttarbíl.
Þetta kemur fram í dagbók lögreglunnar á höfuðborgarsvæðinu en þar segir einnig að fjórar tilkynningar bárust um innbrot þessa aðfaranótt mánudags. Fyrst ber að nefna í skartgripaverslun í miðborginni, í bifreið í hverfi 108 og heimahús í Kópavogi. Auk þess hafði lögregla afskipti af manni á sjötta tímanum í gær sem gerði sig líklegan til að hnupla úr verslun í sama sveitarfélagi.
Þá var ökumaður einnig stöðvaður í Neðra-Breiðholti í gær þar sem hann ók á 74 kílómetra hraða þar sem leyfilegt er að aka á 30. Hann viðurkenndi brot sitt og má búast við sekt og sviptingu ökuréttinda í þrjá mánuði.
Undir miðnættið var bifreið ekið á aðra í Kópavogi og stungið af. Skömmu síðar náði lögregla þeim sem grunaðir eru um ákeyrsluna, auk þess sem talið er að ekið hafi verið undir áhrifum áfengis, án gildra ökuréttinda auk þess sem þeir eru taldir hafa haft fíkniefni í fórum sínum.
Þeir voru vistaðir í fangageymslu.