Viðskiptavinir Hreyfingar flúðu út í sloppum eftir að eldur kom upp í kjallaranum. Sennilega kviknaði í þvottavél.
Eldur kom upp í kjallara Hreyfingar í Glæsibæ í morgun. Rýma þurfti bygginguna en þurftu sumir viðskiptavinir að hlaupa út á sloppnum. Vísir greinir frá þessu en samkvæmt fréttinni er talið að kviknað hafi í þvottavél sem er í kjallara Hreyfingar.
Ágúst Johnsen, eigandi Hreyfingar segir í viðtali Vísis að hún hafi verið á staðnum þegar bruninn varð, „það gaus upp einhver stybba, reykur“ sagði Ágústa en bætti við að hún hefði ekki séð eld. Telur Ágústa að um það bil 300 manns hafi verið í Hreyfingu þegar eldurinn kom upp. Slökkviliðið mætti fljótt á vettvang og slökkti eldinn. Nú er verið að reykræsta og vonar Ágústa að tjónið verði ekki mikið en býst þó við einhverju tjóni.
Fram kemur í frétt Vísis að starfsmenn Hreyfingar hafi verið í smá áfalli eftir þetta. Segir einn þeirra að reykurinn hafi verið það svakalegur að hún hafi fengið í lungun og sortnað fyrir augun „þetta var bara ótrúlega mikill reykur, ég hélt það myndi líða yfir mig.“ Annar starfsmaður segir að flestir viðskiptavinir hafi kveikt strax á perunni og komið sér út en „fólk hélt áfram að taka nokkrar æfingar en svo var einn og einn sem byrjaði að kveikja.“