Bæði lús og njálgur hafi verið á undanhaldi í kórónaveirufarldrinum hér á landi. Án þess að fyrir því liggi nákvæm tölfræði má merkja þetta á færri fjölda kvartana sem til embættis landlæknis hafa borist vegna óværunnar. Ása St. Atladóttir, verkefnastjóri sýkingavarna hjá embætti Landlæknis, staðfestir þetta.
Þetta kemur einnig saman við þær sölutölur sem lyfjasalar hafa hjá sér yfir þær meðferðir sem við þessum kvillum eru. Nokkra söluminnkun má finna á bæði meðferðum við lúsinni og njálgnum í apótekum. Það staðfestir Anna Sólmundsdóttir, lyfsali hjá apóteki Lyfju í Ármúla. „Já, þetta er alveg rétt að það er bæði minna um njálg og lús enda líka alveg eðlilegt á þeim tímum þegar færri eru að hittast og betur er hugað að sóttvörnum. Við finnum þennan mun, lyf í þessum flokkum hafa selst greinilega minna,“ segir Anna.
Samkvæmt þeirri töfræði sem Ása er með í höndum má sjá að um þrjú hundruð færri tilkynningar vegna njálgs hafa borist embættinu í ár miðað við í fyrra. Skýringin blasir við að hennar mati. „Allt þetta handhreinlæti sem núna, þegar allir eru að þvo sér og spritta, er viðhaft rýfur smitleið njálgs. Varðandi lúsina þá finnst mér fólk kvarta minna um hana. Það er bara frábært og fagnaðarefni,“ segir Ása.
Ef þú ert að glíma við annan hvorn kvillan sem hér er fjallað um, þá getur þú kynnt þér réttu viðbrögðin hér.