Lögregla hóf eftirför þegar ökumaður hlýddi ekki merki um að stöðva í umferðinni. Ökumaðurinn ók þó ekki yfir hámarkshraða og reyndi ekki að flýja lögreglu. Kallað var eftir liðsauka og ökuþórinn var að lokum króaður af. Hann gaf lögreglu þá skýringu að hafa verið að leita að stað til þess að stöðva bifreiðina. Mælingar leiddu í ljós að hann var ölvaður og réttindalaus. Sá drukkni var handtekinn en látinn laus að blóðsýnatöku lokinni.
Lögreglan kom að árekstri þar sem önnur bifreiðin reyndist vera óökufær eftir slysið. Annar ökumannanna er án ökuréttinda. Málið í rannsókn.
Skjótt var brugðist við eftir að tilkynning barst um að drengur, um 16 til 17 ára, væri vopnaður hnífi við Hagkaup í Skeifunni. Drengurinn var þó að sögn ekki að hóta eða ógna með hnífnum. Hann fannst ekki þegar lögreglu bar að garði.
Tveir meintir dópasalar voru handteknir í nótt. Þeir eru grunaðir um sölu og dreifingu fíkniefna. Fíkniefni, hnífur, piparúði og rafvopn fundust við leit í bifreið sakborninga. Þeir voru báðir handteknir og læstir inni í klefa vegna rannsóknar málsins.
Að vanda var nokkuð um drukkna og dópaða ökumenn í umferðinni. Einn var stöðvaður, grunaður um að vera undir áhrifum fíkniefna. Hann var handtekinn en látinn laus eftir að dregið hafði verið úr honum blóð. Annar ökumaður var stöðvaður í umferðinni grunaður um ölvun við akstur. Hann var handtekinn en látinn laus að blóðsýnatöku lokinni.