Dularfullt hljóð hefur haldið vöku fyrir sumum Akureyringum undanfarin ár. Hefur hljóðið verið kallað draugahljóð og ekki fengist haldbær skýring á uppruna þess. Svo virðist sem það hangi yfir ákveðnum hverjum bæjarins og hefur plagað marga íbúa árum saman.
Samkvæmt Vísi vaknaði umræða um hljóðið dularfulla að nýju eftir að tónlistarmaðurinn Þorvaldur Bjarni Þorvaldsson, ritaði færslu á Facebook þar sem hann spyr netverja að því hvort þeir viti hvaðan þetta hljóð kemur.
Margar tillögur hafa komið upp hjá þeim sem svara Þorvaldi. Vaðlaheiðagöng eru til dæmis nefnd sem skýring en aðrir benda á að hljóðið sé eldra en göngin. Þá benda aðrir á að þetta séu skipahljóð en mótrök koma fram í þá veru að engin skip liggi við bryggju á Akureyri. Þá eru snjóframleiðsluvélar í Hlíðafjalli einnig nefndar til sögunnar og kælitúrbínur iðnaðarfyrirtækja. Tillögurnar margar en uppruninn enn óþekktur.
Hér getur þú hlustað á hljóðið dularfulla.
„Þetta er ferlega draugalegt hljóð, og leiðinlegt, það sveigist á milli G og A og fer aðeins upp og aðeins niður. Það er það sem gerir það að verkum að þú ferð að hlusta á þetta. Þegar maður er að gera „scary“ tónlist þá gerir maður svona hljóð,“ sagði Þorvaldur Bjarni í samtali við Vísi.