Einar Þorsteinsson, fréttamaður á RÚV, svarar fyrir sig í athugasemd við færslu Helgu Völu Helgadóttur, þingkonu Samfylkingarinnar. Hún hraunaði yfir Einar og hans störf í Kastljósi í gær. Gestur Einars var Már Kristjánsson, formaður farsóttanefndar Landspítalans, og var Einar nokkuð aðgangsharður, líkt og hann á að vera.
Helgu Völu blöskraði framganga Einar en dregur þó nokkuð í land í færslu sem hún birti í morgun. Þar skrifa hún. „Ég starfaði eitt sinn í fjölmiðlum. Þá fengum við iðulega yfir okkur gusur. Stundum voru gusurnar réttmætar, stundum ofboðslega ómálefnalegar. Þarna var stundum talað um að þegar fjölmiðlafólkið næði að láta hjartað slá í fólki hringinn í kringum borð valdsins þá hefðum við líklega stungið á einhverju kýli. En við urðum líka stundum sár og stundum hæstánægð með umfjöllunina,“ segir Helga Vala og bætir við það:
„Þegar gagnrýni á framgöngu fjölmiðlafólks í einstaka viðtali er kölluð “aftaka” verð ég ögn hugsi. Það er engum greiði gerður með því að slá slíkri skjaldborg um fjölmiðlafólk, hvorki fjölmiðlafólki né lýðræðinu. Þau, eins og við öll, hafa gott af umræðunni um störf sín. Orðaskiptin hafa vægast sagt verið hressandi en auðvitað leynist inn á milli fólk sem fer yfir strikið. Það þekkjum við sem störfum í stjórnmálum líka. Einar Þorsteinsson er reyndur fjölmiðlamaður og ég þykist vita að hann þolir umræðu um störf sín og hafi jafnvel gaman af.“
Þessu svarar Einar í athugasemd og segir Helgu Völu ekki þurfa að hafa áhyggjur af sér. Athugasemdir hennar séu þrátt fyrir það til skammar. „Ég þoli vel umræðu um störf mín og kveinka mér ekki. Ég tek þó takmarkaðan þátt í þessari umræðu en reyni að verja eðlilega fréttamennsku. Prófaðu að lesa kommentin við þessa “málefnalegu gagnrýni” og veltu fyrir þér hvort umræðan er uppbyggileg og skemmtileg aflestrar. Ábyrgðin liggur víða,“ segir Einar.
Helga Vala játar og segir: „Tek undir að margir fara langt yfir strikið – taldi mig þó ekki vera þar en það kann að vera rangt. Mögulega átti upphafsfærslan að vera lengri, miklu lengri með öllu því sem ég segi neðar. Kannski ég skrifi stutta grein“
Þessu svarar Einar til baka: „Upphaflegur status þinn er einföld upphrópun og hneikslun sem var einvörðungu fallin til að særa fram tröll. Sem hann gerði. Status sem fælir fjölmiðlamenn frá því að stunda gagnrýna fréttamennsku til að lenda ekki í hakkavélinni. En ég er með þykkan skráp. Kom mér bara á óvart að sjá þetta frá fyrrverandi fjölmiðlakonu. Það kemur líklega hratt móða á fréttagleraugun þegar maður situr á Alþingi.“