Anna Wintour, ritstjóri og listrænn stjórnandi Condé Nast, tilkynnti í gær að Met Gala-ballinu hefur verið aflýst en ballið er einn stærsti viðburður tískuheimsins og haldið árlega.
Tilkynning þess efnis að ballinu væri aflýst var send út í gær. Met Gala átti að fara fram 4. maí á Metropolitan Museum of Art í New York en öllum viðburðum í safninu til 15. maí, þar sem fleiri en 50 koma saman, hefur verið aflýst vegna útbreiðslu COVID-19. Þessu er greint frá á vef The New York Times.
Wintour er í forsvari fyrir ballið sem er jafnframt góðgerðasöfnun. Það er hún sem sér um allt skipulag og útbýr gestalistann fyrir Met Gala en það þykir mikill heiður að fá boðskort á viðburðinn. Wintour sagði það hafa verið óumflýjanlegt að fresta ballinu í ár.
Í fyrra mættu 550 gestir á Met Gala og upphæð sem nemur um tveimur milljörðum króna safnaðist á ballinu.