Ekki er útilokað að samkomubann verði sett á hér á landi vegna útbreiðslu COVID-19. Þetta kemur fram í Facebook-færslu almannavarnadeildar ríkislögreglustjóra þar sem ráð eru gefin vegna COVID-19 og mannamóta.
Þar segir m.a.: „Ekki er samkomubann í gildi á Íslandi en ekki er útilokað að gripið verði til slíkra aðgerða meðan unnið er að því að stemma stigu við útbreiðslu veirunnar hér á landi. Því er eðlilegt að skipuleggjendur fjölmennra viðburða séu uggandi yfir stöðunni. Meðan faraldur geisar þarf ávallt að meta hvort rétt sé að halda viðburð eða hvort betra sé að fresta tilteknum viðburði þar til faraldur er genginn yfir.“
Í færslunni segir að skipuleggjendur viðburða gæti vel að smitvörnum og að nauðsynlegt sé að gestir hafi aðgang að heitu vatni og sápu, handspritti og einnota þurrkum.
Skipuleggjendur viðburða eru beðnir um að taka ákvarðanir að vel ígrunduðu máli. „Þar sem ekki hefur verið sett á samkomubann þá er það á ábyrgð skipuleggjenda viðburða að taka upplýsta ákvörðun um framhaldið. Ef grunur leikur á að ekki verði hægt að tryggja öryggi einstaklinga sem eru í áhættuhópi eða að erfitt verði að tryggja gott aðgengi að hreinlætisaðstöðu, handspritti o.þ.h. er ráðlagt að taka til skoðunar hvort halda skuli viðburðinn.“
Fólk er þá minnt á að þvo hendur reglulega, nota handspritt og hnerra eða hóta í einnota þurrku eða í olnbogabótina.
Færsluna má sjá hér fyrir neðan: