Anna Wintour, ritstjóri bandaríska Vogue, hvetur neytendur til að vanda valið meira þegar kemur að fatakaupum og hætta að hugsa um flíkur sem einnota.
Anna nýtti tækifærið í viðtali við Reuters og biðlaði til fólks að hugsa betur um fötin sín og gefa heilleg föt áfram í stað þess að henda þeim þegar viðkomandi hættir að nota þau.
Hún hvatti fólk til að kaupa vönduð föt og útrýma þeirri hugsun að föt geti verið einnota. Hún segir þetta vera skilaboð sem séu gegnumgangandi í Vogue. „Þetta snýst um að miðla því til lesenda okkar – að halda upp á þau föt sem þeir eiga og kunna að meta þau. Og nota fötin aftur og aftur,“ sagði Anna.
Patricia Espinosa, leiðtogi loftslagsskrifstofu Sameinuðu þjóðanna, hefur hrósað Önnu fyrir þennan boðskap og segir útgáfufyrirtækið Condé Nast’s sem gefur út Vogue geta haft mikil áhrif með því að veita lesendum upplýsingar og fróðleik um sjálfbæra og umhverfisvæna tísku.