Vonir standa til þess að WOW air ljúki fjármögnun í dag eða á allra næstu dögum. Icelandair glímir við erfiðan grunnrekstur og íþyngjandi fjárhagsskilyrði í lánasamningum. Útlit er fyrir áframhaldandi krefjandi aðstæður.
Skúli Mogensen, eigandi og forstjóri WOW air, og aðrir þeir sem hafa tekið þátt í fjárfestakynningum félagsins, eru vongóðir um að fjármögnun félagsins muni ganga eftir, en tilboðsbók fyrir fjárfesta, til að taka þátt í fjármögnuninni, mun loka í dag samkvæmt áætlunum. Bókin var opnuð á miðvikudag.
Á undanförnum vikum hefur félagið verið kynnt fyrir fjárfestum – íslenskum lífeyrissjóðum og bönkum þar á meðal – og vonast er til þess að fjárfestar bíti á agnið, og komi fram með sex til tólf milljarða króna til að bjarga félaginu. Líklegt þykir að WOW nái því markmiði með fjármagni frá erlendum fjárfestum, sem munu þó vera með belti og axlabönd í viðskiptunum. Litlar sem engar líkur eru á því að íslenskir lífeyrissjóðir kaupi.
Staðan hjá hinu stóra íslenska flugfélaginu, Icelandair, er ekki síður varhugaverð. Þrátt fyrir sterka fjárhagsstöðu er félagið í miklum vandræðum með sinn grunnrekstur og versnandi grunnafkoma hefur þegar leitt til þess að Icelandair mun brjóta lánaskilmála.
Full útgáfa af fréttaskýringunni er að finna í nýjasta tölublaði Mannlífs og á vef Kjarnans.
Eftir: Magnús Halldórsson og Þórð Snæ Júlíusson