Eiginmaður kennarans lést úr hjartaáfalli – Láta eftir sig fjögur börn

Joe Garcia, eiginmaður Irmu Garcia, kennarans sem lést í skotárásinni í Texas, er látinn. Greindi fréttamiðillinn TMZ frá andlátinu en lést Joe úr hjartaáfalli. Haft er eftir fjölskyldumeðlimi að hann hafi látist úr sorg en höfðu Irma og Joe verið gift í 24 ár. Láta þau eftir sig fjögur börn á aldrinum 13 til 23 ára.

Nítján börn og tveir kennarar létust í skotárásinni en Irma var annar þeirra. Hvítir krossar hafa verið settir á skólalóðina til minningar um þá sem létust. Þá hafa vaknað spurningar foreldra um viðbragð lögreglu  sem stödd var á vettvangi þegar árásin átti sér stað.