Palestínsk yfirvöld segja að minnsta kosti 36 hafi fallið í árás Ísraelshers á Nuseirat-flóttamannabúðirnar í miðhluta Gaza í gær, þar sem Ísraelar halda áfram að gera hrottafengnar árásir víðs vegar um Gaza.
Ríkisfjölmiðlaskrifstofan á Gaza sagði árásina í gær hafa verið „villimannsleg og viðbjóðslegt fjöldamorð“ og benti á að flestir þeirra sem létu lífið væru úr al-Sheikh Ali fjölskyldunni. „[Ísraelski] hernámsherinn vissi að þetta er blokk með mörgum íbúðum sem hýsa tugi óbreyttra borgara, barna, kvenna og flóttafólks,“ sagði skrifstofan.
Læknar sögðu Reuters fréttastofunni að eldur eftir loftárás Ísraelshers hafi kviknað í pósthúsi í Nuseirat þar sem palestínskar fjölskyldur hafa verið á flótta, sem og í nærliggjandi hús. Ljósmyndir frá vettvangi sýna ung börn þakin ryki og blóði í rústum hrundrar byggingar.
Á Gaza er ekki óalgengt að loftárásir drepi fjölda meðlima sömu fjölskyldu, þar sem stríð Ísraels heldur áfram inn í sitt annað ár.
Frá og með október 2024, eins árs afmæli stríðsins, höfðu árásir Ísraela útrýmt algjörlega að minnsta kosti 902 heilum fjölskyldum á svæðinu, að sögn fjölmiðlaskrifstofu ríkisstjórnarinnar á Gaza.
Í gegnum stríðið hafa ísraelskir hermenn ráðist á mannvirki og byggingar sem skýla fjölskyldum á flótta, sem halda því oft fram, með litlum sem engum sönnunargögnum, að þær séu notaðar sem aðgerðastöðvar fyrir Hamas-samtökin. Ísraelsk yfirvöld hafa enn ekki tjáð sig um árás gærdagsins í Nuseirat.
Þá hafa heilbrigðisstofnanir, blaðamenn og mannúðarstarfsmenn einnig greint frá því að ísraelskir hermenn hafi sérstaklega beint árásum sínum að þeim frá því átökin hófust í október 2023, þegar Hamas gerði mannskæða árás á suðurhluta Ísraels sem drap um 1.100 manns, flestir óbreyttir borgarar.
Á þeim tíma sem liðinn er síðan hafa árásir Ísraela kostað meira en 44.800 Palestínumenn lífið á Gaza, meira en helmingur þeirra konur og börn, þó talan sé almennt talin mun hærri.