Hundaræktandi lifði ekki af árás hunda.
Í gær fundust líkamsleifar hundaræktanda í Compton í Los Angeles í Kaliforníuríki í Bandríkjunum en samkvæmt lögreglu staðarins lést maðurinn, á fimmtudaginn, eftir árás hunda sem hann var að rækta. Nágranni mannsins tilkynnti atvikið til lögreglu. Ekki liggur fyrir af hverju hundarnir réðust á manninn en lögreglan telur að hann hafi verið að gefa hundunum að borða þegar þeir réðust á hann.
Í bakgarði mannsins fundust fimm pit-bull hundar en þeir eru svokallaðir vígahundar og eru bannaðir á Íslandi þrátt fyrir mikil mótmæli sumra hundaeiganda. Ekki er ljóst hvað verður um hundana fimm en þeir eru eins og er í umsjón dýraeftirlitsyfirvalda í Los Angeles-sýslu. Stjórnandi þeirra vottaði fjölskyldu og vinum mannsins samúð sína og sagði að þeir myndu reyna komast að niðurstöðu í málinu til að reyna tryggja öryggi borgara og hundanna.