Poki af kókaíni fannst í vestur álmu Hvíta Hússins fyrir rúmri viku síðan við reglubundið eftirlit en Leyniþjónusta Bandaríkjanna, sem hefur m.a. það hlutverk að gæta forsetans og ber ekki að rugla saman við CIA, hefur nú lokað rannsókninni vegna skorts á haldbærum sönnunargögnum.
Leyniþjónustan segist ekki geta borið kennsl á nokkurn sem gæti hafa skilið efnið eftir þar sem þau hafi ekki undir höndum neinar upptökur úr myndavélakerfum til að bera kennsl á sökudólginn.
Enn fremur fann Alríkislögreglan í Bandaríkjunum, FBI, hvorki fingraför né DNA sem þau gátu borið saman við þann hóp fólks sem gæti hafa skilið þetta eftir, eins og t.a.m. starfsfólk hússins.
Efnið mun hafa fundist í íláti sem er ætlað undir persónuleg raftæki fólks sem það skilur við sig áður en því er hleypt inn í vesturálmuna.
Í ljósi þess að Hvíta Húsið er aðsetur og vinnustaður eins valdamesta manns í heimi má leiða að því líkum að annaðhvort er þar eftirliti alvarlega ábótavant eða ekki hafa öll kurl komist til grafar.