Kona sem myrti móður sína slapp af sjúkrastofnun og er nú leitað. Almenningur er beðinn um að nálgast hana ekki.
Mirror segir frá því að Laura Van Marle, 43 ára, hafi flúið frá sjúkrastofnun þar sem hún hafði dvalið, í bænum Wellington, Somerset í Englandi en hún hafði áður verið dæmd til að dvelja ótímabundið á stofnuninni eftir að hún viðurkenndi að hafa myrt móður sína.
Lögreglan segir að hún hafi flúið á tveimur jafnfljótum eftir að hafa hótað starfsmanni sjúkrastofnunarinnar með vopni er hún var í fylgdarleyfi. Starfsmaðurinn hlaut engin meiðsl.
Hennir er lýst af lögreglu sem 170 cm á hæð, grönn með ljóst hár. Laura sást síðast klæðast hvítum bol, gráum gallabuxnastuttbuxum og svörtum íþróttaskóm en gæti hafa skipt um föt.
Lögreglan í Avon og Somerset lýsa leitinni að Lauru sem „hraðri aðgerð“ og að rannsakendur séu að skoða allar vísbendingar. Lögreglumenn á jörðu niðri hafa fengið aðstoð frá þyrlusveitum lögreglunnar í kringum Wellington-svæðið, auk sérfræðinga, hunda og stjórnenda þeirra.
Vitað er að Laura getur gengið langar vegalengdir, gæti hafa yfirgefið Wellington-svæðið fótgangandi eða með almenningssamgöngum. Hún hefur tengsl við Hereford-skíri. Almenningur er beðinn um að nálgast hana ekki heldur hringja strax á neyðarlínuna.
Árið 2021 var Laura dæmd til ótimabundinnar dvalar á „viðeigandi sjúkrahúsi“ eftir að hún viðurkenndi að hafa stungið 69 ára gamla móður sína, Susanna Van Marle, til bana en hún fannst látin í þorpinu Cradley í Hereford-skíri, þann 26. september 2020. Hún hafði þá ferðast um 241 kílómetra til móður sinnar, frá Dorset, þar sem hún hafði valið að lifa undir berum himni, áður en hún braust inn til móður sinnar og réðist á hana með eldhúshníf.