„Ég held enn í vonina um að hún verði haldin á næsta ári,“ segir Michael Eavis, framkvæmdastjóri Glastonbury tónlistarhátíðarinnar í samtali við ITV News. „Ég mun setja allt á annan endann til að reyna að tryggja það að hátíðin verði haldin þá, en það þýðir ekki endilega að af því verði. Það er í rauninni bara óskhyggja.“
Eavis sagði að það eina sem hægt væri að vera viss um væri að það yrði fagnað á Glastonbury árið 2022. Spurður hvort hann óttaðist að hátíðin myndi líða undir lok ef það þyrfti að fresta henni aftur á næsta ári sagðist hann vera sannfærður um að hátíðin myndi lifa þetta af. „Það er ekki hægt að drepa hana svona auðveldlega,“ fullyrti hann. „Hún kemur aftur, sennilega ennþá öflugri.“
Glostonbury hátíðinni í ár, sem hefði orðið sú fimmtugasta í röðinni, var frestað eins og flestu öðru vegna kórónaveirufaraldursins. Meiningin var að hátíðin yrði óvenju vegleg í ár til að fagna fimmtugsafmælinu og aðalnúmerin áttu að vera þau Paul McCartney, Kendric Lamar og Taylor Swift auk þess sem engin önnur en Diana Ross ætlaði að koma fram. Vonir stóðu til að hægt yrði að lofa viðlíka stórstjörnum á hátíð næsta árs en þar sem óvissan og óttinn í kringum kórónaveirufaraldurinn heldur áfram að aukast verður sú von sífellt veikari. Sennilega verður komið árið 2022 þegar óhætt verður að halda slíka hátíð á ný.