Andrew Bretaprins er ósamvinnuþýður við rannsókn á máli Jeffrey Epstein að sögn bandaríska saksóknarans Geoffrey S. Berman.
Berman og fulltrúar bandarísku alríkislögreglunnar hafa haft samband við lögmenn Andrews en Andrew hefur alltaf haldið því fram að hann hafi aldrei orðið vitni að neinu grunsamlegu í kringum Epstein sem gæti bent til mansals eða vændis
Berman sagði á blaðamannafundi í dag að Andrew hefði hingað til ekki verið samvinnuþýður en að rannsókn lögreglu á máli Epstein miði ágætlega áfram. Þetta kemur fram á vef BBC.
Segist ekkert vita um málið
Lögmaður kvennanna sem hafa sakað auðkýfinginn og kynferðisafbrotamanninn Jeffrey Epstein um mansal og misnotkun, hefur sagt Andrew eiga að bera vitni í máli kvennanna. Hann telur Andrew búa yfir mikilvægum upplýsingum er varða ásakanirnar á hendur Epstein en eins og áður sagði heldur Andrew því fram að hann viti ekkert um málið þrátt fyrir að hann hafi verið tíður gestur á heimilum Epstein.
Í umdeildu viðtali sem Andrew veitti BBC Newsweek gerði hann þá lítið úr vináttu sinni við Epstein og þvertók fyrir að muna eftir Virginia Giuffre, konunni sem hefur ásakað Andrew um að hafa nauðgað sér þegar hún var 17 ára á heimili Epstein.
Sjá einnig: Segir Andrew eiga að bera vitni