Tilkynnt hefur verið um andlát Sinéad O’Connor, en hún var aðeins 56 ára.
Írski vefurinn RTE birtir tilkynningu frá fjölskyldu söngkonunnar sem segir: „Við tilkynnum það með miklli sorg að okkar ástkæra Sinéad er látin. Fjölskylda hennar og vinir eru harmi slegnir og hafa óskað eftir næði á þessum erfiða tíma.“
Eftir að frægðarsól hennar reis sem hæst í upphafi 10. áratugarins fór að halla undir fæti hjá henni. Hún sagði í viðtali við Oprah árið 2017 að hún þjáðist af geðhvarfasýki og hefði upplifað sjálfsvígshugsanir. Hún hætti við tónleikaferð sína árið 2012 í kjölfar taugaáfalls og árið 2015 sagði hún frá því á Facebook að hún hefði tekið of stóran skammt af lyfjum og stuttu síðar sagði hún að henni hefði verið haldið á sjúkrahúsi þar sem geðheilsa hennar hefði verið metin. Í ofanálag fannst 17 ára sonur hennar látinn í janúar í fyrra.
Ekki hefur verið greint frá dánarorsökum O’Connor.