Illa fór fyrir hinum velska Barry Griffiths í fyrra þegar hann stakk sig fyrir slysni til bana.
Lögreglurannsókn á andláti hans lauk fyrr í vikunni og voru niðurstöður rannsóknarinnar kynntar en hún leiddi í ljós að Griffiths, sem bjó einn, hafði verið að taka í sundur frosna hamborgara með hníf. Griffiths hafði litla hreyfigetu í öðrum handleggnum eftir að hafa fengið heilablóðfall.
Hinn 57 ára gamli maður er sagður hafa verið vinafár og tók það meira en viku áður en einhver saknaði hans og mætti lögreglan heim til hans til að athuga málið. Þegar þangað var komið fann lögreglan Griffiths liggjandi á gólfinu heima hjá sér en blóð úr honum fannst inn á ganginum, stofunni og svefnherberginu.
Rannsakað var hvort einhver annar hafi verið með honum og mögulega stungið hann en ekki fundust nein sönnunargögn sem studdu slíkar kenningar og engu hafði verið stolið úr íbúð Griffiths. Þá var ekkert sem benti til þess að Griffiths hafi glímt við þunglyndi eða hafi íhugað að taka eigið líf.
