Bjarni Benediktsson, fjármála- og efnahagsráðherra, reiknar með að ríkissjóður verði rekinn með hundrað milljarða króna halla á þessu ári vegna áhrifa útbreiðslu COVID-19 á efnahagslífið.
Bjarni mætti í Bítið í morgun þar sem hann ræddi aðgerðir ríkisstjórnarinnar vegna COVID-19. Hann telur mikilvægt að fólkið í landinu haldi störfum sínum og segir aðgerðir ríkisstjórnarinnar snúast að miklu leyti um það.
Hann sagði aðstæður núna geta orðið til þess að tekjur fyrirtækja falla um 50% og jafnvel meira. „Þau fyrirtæki þurfa stuðning,“ sagði Bjarni.
„Þess vegna segi ég, að við þurfum að stíga stór skref núna. Við þurfum að koma af fullum krafti inn í þessa mynd,“ sagði Bjarni. Hann sagði mikilvægt að styðja fyrirtækin í landinu við að halda starfsfólki hjá sér á launum og reyna þannig að koma í veg fyrir að atvinnuleysi rjúki upp því að það yrði mesta tjónið.
Kostnaðurinn við að aðstoða fyrirtæki við að greiða starfsfólki laun mun takmarka tap ríkisins ef litið er til lengri tíma segir Bjarni.
Sjá einnig: Ríkisstjórnin undirbýr enn stærri björgunarpakka