Nokkur ummæli sem voru látin falla í vikunni.
„Það er komin kreppa. Hún verður sú dýpsta frá hruni og allt annars eðlis en það sem við höfum undirbúið okkur fyrir.“ – Þórður Snær Júlíusson, ritstjóri Kjarnans.
„Það gerir ekki lítið úr neyð Íslendinga að hjálpa útlendingum.“ – Séra Davíð Þór Jónsson skrifar svo í pistli sem hann deilir á Facebook og spyr hvar mannúðin sé.
„Ég skal fúslega viðurkenna að ég hef verulegar áhyggjur af því hvernig gengið muni þróast næstu daganna og vikurnar þegar ljóst verður að gríðarlegt högg mun koma á ferðaþjónustna vegna kórónuveirunnar.“ – Vilhjálmur Birgisson, formaður Verkalýðsfélags Akraness.
„Þótt verkefnið sé flókið er það viðráðanlegt, ef stjórnvöld hafa kjark og framsýni til að stíga nægilega fast til jarðar; kynna fjölbreyttar aðgerðir til að milda efnahagshöggið. Til þessa hefur ríkisstjórnin verið of svifasein og óskýr.“ – Logi Einarsson, formaður Samfylkingarinnar.
„Áður þaggaðar og jaðarsettar konur, sem fáir höfðu fram að því haft áhuga á, stigu fram með sjálfsvirðinguna að vopni og skiluðu skömm láglaunastefnunnar þangað sem hún á heima.“ – Sólveig Anna Jónsdóttir, formaður Eflingar, lýsir yfir sigri í kjaraviðræðum við Reykjavíkurborg.
„Þá er lokið þriggja vikna verkfalli láglaunafólksins í Reykjavík, sem gengur frá velli með nokkra leiðréttingu á skammarlegum launum sínum og sigur á ófyrirleitnum borgaryfirvöldum í þessari deilu. Meirihlutinn í borginni gengur hins vegar frá þessum viðskiptum með skömmina eina.“ – Gunnar Smári Egilsson, athafnamaður og sósíalistaforingi.
„Þetta og fleiri skrif og umsagnir úr þessum ranni í dag sýna hvað strákarnir á framabraut, sem innistæðulaust kalla sig sósíalista, eru svekktir yfir að samningar náðust og að þeir eru ekki lengur einhverskonar aðilar að opnu persónulegu stríði við Dag sérstaklega og svo Samfylkinguna og borgarstjórnarmeirihlutann.“ – Einar Kárason rithöfundur um skrif Gunnars Smára.
„Dugar ekki lengur að fela sig á bak við sérfræðinga.“ – Sigmundur Davíð Gunnlaugsson, formaður Miðflokksins, gagnrýnir stjórnvöld fyrir skort á aðgerðum gegn kórónaveirunni.
„Eins og staðan er núna er öruggara að vera í Kína en á Íslandi.“ – Gunnar Andrésson, læknir á Landspítalanum, um útbreiðslu kórónaveirunnar.
„Hérna sitjum við og blótum guði allsnægtar og óhófs og hendum þeim út á eyrunum þessum börnum þegar þau biðja um hjálp.“ – Kári Stefánsson, forstjóri Íslenskrar erfðagreiningar, um flóttabörnin á Íslandi sem eiga yfir höfði sér brottvísun.