Tíu ára stelpa mætti með kókaín í skólann – Stjórnendur minna á skaðsemi eiturlyfja

Tíu ára stelpa í Seguin í Texas í Bandaríkjunum var handtekin í lok janúar fyrir að hafa mætt með lítinn poka af kókaíni í Jefferson grunnskólann.

Samkvæmt fjölmiðlum í Texas fann annar nemandi pokann í skrifborði stelpunnar og tilkynnti stjórnendum skólans um það. Í kjölfarið var hringt á lögregluna og framkvæmdi hún tilraun á hvíta efninu í pokanum til að staðfesta grun sinn og reyndist það vera kókaín. Lögreglan handtók tíu ára stelpuna í framhaldinu

Í tilkynningu frá lögreglunni sagði hún að stefna hennar væri að tryggja öryggi allra nemenda og starfsmanna og þakkaði skólanum fyrir aðstoðina við rannsóknina á málinu.

Maria Guerra, skólastjóri Jefferson grunnskólans, sagði í tölvupósti til foreldra að skólinn gerði sitt besta til að tryggja öryggi nemenda skólans. Þá minnti hún foreldra á að ræða við börn sín um hversu hættuleg eiturlyf eru og að börnin ættu að tilkynna alla grunsamlega hegðun til fullorðna.

Þá hvatti hún foreldra til þess að hafa samband ef þeir hefðu einhverjar spurningar varðandi málið.