Ester Ósk Liljan Óskarsdóttir lést af slysförum 14. febrúar, aðeins 38 ára að aldri. Ester Ósk lenti í hræðilegu slysi deginum áður og komst aldrei til meðvitundar.
Ester Ósk lætur eftir sig einn son, Arnar Óla, 14 ára.
Yngri systir Esterar Óskar, Vilborg Helga, minnist systur sinnar sem bestu vinkonu sinnar, sálufélaga og trúnaðarvinkonu.
„Hún var risa stór karakter eins og allir vita. Ég elska hana eins mikið og hægt er og miklu meira en nokkurntímann það og mun gera allt sem í mínu valdi stendur til að halda minningu hennar á lofti, standa mig í því sem hún var stoltust af í mínu fari og það er að vera besta útgáfan af sjálfri mér til að vera eins góð móðir og ég mögulega get,“ segir Vilborg Helga.
Vilborg Helga á dótturina Svanborgu Ósk Liljan, sem er guðdóttir Esterar Óskar og segir Vilborg Helga Svanborgu Ósk og Ester Ósk hafa verið perluvinkonur og dóttur hennar hafa elskað Esteri Ósk meira en allt.
„Það sem einkenndi Ester mest er það hvað hún var ljúf, góð og með risastórt hjarta. Sá það besta í öllum án þess að dæma nokkra manneskju,“ segir Vilborg Helga.
Söfnunarreikningur fyrir Arnar Óla
Arnar Óli, sem verður 15 ára síðar á árinu, var elskaður heitt af móður sinni. „Hún elskaði hann af öllu hjarta og vildi ekkert meira en að sjá hann vaxa og dafna á heilbrigðan hátt,“ segir Vilborg Helga.
Vinir og jafnaldrar Esterar Óskar hafa stofnað söfnunarreikning, ætlaðan syni hennar; og verður styrkurinn lagður inn á lokaðan framtíðarreikning á hans nafni, sem mun nýtast honum á lífsleiðinni eftir 18 ára aldur.
Þeir sem vilja sýna samhug og leggja söfnuninni lið geta lagt frjáls framlög inn á eftirfarandi reikning á nafni Arnars Óla, sonar hennar.
Reikningsupplýsingar: 0552-18-000236
Kennitala: 160805-3070
Liljurnar fjórar
Vilborg Helga og Ester Ósk völdu að taka upp Liljan nafnið eftir dóttur Vilborgar Helgu, og síðan gáfu þær móður þeirra Liljan nafnið líka.
„Við vorum Liljurnar 4 og það var sárt að þurfa að kveðja 1 Liljuna okkar. Ég vil ekki trúa þessu og mun líklegast ekki gera það í bráð. Ég veit ekki hvernig ég mun fara að í þessu lífi án bestu vinkonu minnar en trúi því að hún muni hjálpa mér í gegnum þetta allt saman. Þetta gerðist alltof hratt og erfitt að meðtaka. Hjartað mitt er í þúsund molum og allir sem þekktu okkur vita að ég og Ester vorum eitt, í einu og öllu. Hún var hinn helmingurinn minn og ég hennar, við gerðum ekkert án þess að ráðfæra okkur við hvor aðra og finnst mér erfitt að geta ekki hringt í hana og spurt hvernig í ósköpunum ég eigi að díla við þessa sjúklega miklu sorg. Ester Ósk Liljan ég elska þig til tunglsins og tilbaka endalaust í hringi og miklu meira en það.“
„Það er ekki hægt að kveðja börnin sín“
„Ester Ósk eignaðist einn son,Arnar Óla árið 2005 sem hún elskaði út fyrir allt og þurfti hann að kveðja móður sína, en Arnar Óli er aðeins 14 ára gamall og á lífið framundan með föður sínum Þórarni Stefánssyni og er yndislegt að sjá og fylgjast með hvað það er kært á milli þeirra feðga og óska ég þeim alls hins besta á lífsins göngu og auðvitað fær amma að fylgjast með.
Það er ekki hægt að kveðja börnin sín og ég veit ekkert hvernig ég á að fara að þessu en Arnar Óli er lifandi eftirmynd móður sinnar sem fyllir hjarta mitt gleði í hvert sinn sem ég sé hann,“ segir Svanborg Liljan Eyþórsdóttir, móðir Esterar Óskar og Vilborgar Helgu.
„Við dóttur mína segi ég, ég elska þig endalaust og út fyrir allt. Þú fæddist á konudaginn og lést á valentínusardaginn elsku hjartað mitt. Lífið verður aldrei eins án þín. Takk fyrir allt hingað til og þangað til næst. Þín mamma.“
Mæðgurnar vilja þakka öllum viðbragðsaðilum fyrir þeirra störf, lögreglu,sjúkraflutningamönnum,yndislegu starfsfólki sjúkrahúss Akraness, yndislegu starfsfólki gjörgæsludeildar Landspítalans Fossvogi og séra Úrsúlu Árnadóttur.
Þær vilja einnig þakka þeim sem hafa sýnt fjölskyldunni samúð og kærleika og gefið þeim styrk til að takast á við sorgina og halda áfram á lífsins braut.