Hin fjölhæfa Eva Ruza Miljevic, skemmtikraftur, blómaskreytingakona, stjörnufréttakona K100 og veislustjóri og sitthvað fleira, á afmæli í dag. Er þetta í 39. skiptið sem Eva á þennan merkisdag.
Eva Ruza, sem þekkt er fyrir afar líflegan persónuleika, býr í Vesturbæ Reykjavíkur með eiginmanni sínum Sigurði Þóri Þórssyni og tvíburum þeirra en þau kynntust þegar Eva var aðeins 17 ára.
Eva var í fallegu viðtali við Vísi í fyrra þar sem hún ræddi samband sitt og Sigurðar, Covid og margt fleira.
„Ást er það allra besta. Það er bara ósköp einfalt svar. Hvort sem það er ást til makans, barnanna eða fjölskyldu og vina. Það er dýrmætt að fá að upplifa ást,“ sagði Eva meðal annars í viðtalinu.
Sjá má á Instagram reikningi Evu að hún fékk fyndna kveðju frá smástirninu William Hung í tilefni dagsins.
Mannlíf óskar Evu Ruzu innilega til hamingju með daginn sinn.