Fyrr í mánuðinum kom franski fatahönnuðurinn Jean Paul Gaultier mörgum á óvart þegar hann greindi frá því að nú væri komið að hans síðustu haute couture-sýningu. Lokasýningin fór svo fram í síðustu viku og var hin glæsilegasta.
Á þessari tímamótasýningu var litið yfir farinn veg. Gaultier sýndi í kringum 200 dress á sýningunni sem höfðu mörg einhverja vísun í hans eldri hönnun.
En hvað er það sem hefur einkennt framlag Gaultier til tískuheimsins í þau 50 ár sem hann hefur verið í bransanum?
Fjölbreyttar fyrirsætur
Tískusýningar Gaultier hafa alltaf vakið mikla athygli enda hefur hann verið duglegur að fara nýjar og öðruvísi leiðir. Hann hefur til að mynda verið óhræddur við að fá áberandi fólk til að ganga tískupallinn fyrir sig; fólk sem ekki starfar sem fyrirsætur, fólk á öllum aldri, fólk úr ólíkum samfélagshópum og af öllum stærðum og gerðum, ef svo má að orði komast. Fyrirsætur með stór og mikil húðflúr hafa einnig verið áberandi á tískupallinum hjá Gaultier í gegnum árin.
Karlar í pilsum
Gaultier hefur í gegnum tíðina hunsað kynjaðar staðalímyndir og farið ýmsar óhefðbundnar leiðir hvað þetta varðar. Hann hefur til dæmis reglulega hannað pils fyrir karlmenn sem hefur oft vakið athygli.
Keilulaga brjóst
Ein þekktasta hönnun Gaultier eru undirföt með keilulaga skálum á brjóstahöldum. Madonna klæddist korsiletti með keilulaga skálum úr smiðju Gaultier á Blond Ambition-tónleikaferðalagi sínu 1990 og gerði þetta snið þá frægt. Þessi keilulaga brjóstahöld eru í dag einkennandi fyrir Gaultier og sams konar snið hefur sést reglulega á sýningum hans síðan á tíunda áratugnum.
Undirföt í aðalhlutverki
Flíkur sem minna á undirföt eru eitt af einkennismerkjum Gaultier. Silki, blúndur og korselett er dæmi um það sem hefur einkennt hönnun hans síðan ferill hans fór almennilega á flug.
Ilmvötnin
Árið 1993 setti Jean Paul Gaultier sitt fyrsta ilmvatn á markað. Tveimur árum síðar kom út rakspíri sem naut mikilla vinsælda eins og ilmvatnið. Síðan þá hafa ýmsar ilmútgáfur komið út og vinsældirnar verið upp og ofan en ilmvatnsflöskurnar eru löngu orðnar klassískar.
Bláar þverrendur
Gaultier fékk snemma innblástur frá frönskum sjóliðabúningum þar sem bláar þverrendur leika stórt hlutverk. Í dag eru peysur og aðrar flíkur með bláum þverröndum á hvítum grunni hálfgert einkennismerki Gaultier. Gaultier klæðist gjarnan sjálfur þverröndóttum bolum.
