Einar Bjarnason, rekstrarstjóri Bláfjalla ,varar við því að fjallaskíðafólk gangi upp og renni sér niður upplýstar brekkurnar. Á Facebook-síðu skíðasvæðanna stendur að fjöldi „skinnara“ sé orðinn svo mikill að starfsmenn Bláfjalla geti ekki lengur unnið brekkurnar, með troðurum.
Einar biðlar til þessa hóps útivistarmanna að ganga ekki upp né skíða niður þessar upplýstu brekkur.
„Það hefur sem betur fer ekki orðið banaslys enn þá hér á landi eins og erlendis af þeirri ástæðu að skinnari hefur fengið spilvírinn sem troðarinn hangir í sig og banað viðkomandi. En það hefur nokkrum sinnum staðið tæpt,“ stendur á Facebook-síðu skíðasvæðanna.
Einar játar sig sekan um að hafa ekki veitt miklar upplýsingar um stöðu mála. „Ég held að við hljótum öll að vera sammála um láta það ekki gerast. Við þurfum klárlega líka að bæta okkur í upplýsingagjöf og erum að vinna í því. Vinnum þetta saman og höfum áfram gaman á fjöllum.“
Einnig segir á síðunni að nú sé kominn nægur snjór í Suðurgilið og Eldborgargilið. Því virðist hefðbundið svigskíðafólk geta farið að draga fram skíðabúnaðinn, brýna kantana og skella skíðabogunum á bílinn, því Bláfjöll opna vonandi bráðum.