Fjármálaráðherra hefur skipað Söru Lind Guðbergsdóttur sem forstjóra Ríkiskaupa tímabundið og án auglýsingar. Þessi ráðstöfun Bjarna Benediktssonar fjármálaráðherra vekur athygli og þá ekki síst í því ljósi að Sara Lind er reynslulítil á þessu sviði og aðeins menntuð sem lögfræðingur. Þá tengist hún Sjálfstæðisflokknum.
Faglega veikur forstjóri
Vefmiðillinn Hringbraut segir frá þessu og vekur athygli á því að Sara er eiginkona Stefáns Einars Stefánssonar, hlaðvarpsstjórnanda Morgunblaðsins og kampavínsinnflytjanda. Mannlífi hafa einnig borist ábendingar vegna málsins sem þykir lykta af spillingu og vinavæðingu. Þá segir í grein Hringbrautar að áhyggjur séu uppi vegna þess að Sara Lind sé „faglega veikur“ forstjóri og málið er sett í samhengi við Lindarhvolsmálið.
Sara Lind var á sínum tíma ráðin til stéttarfélagsins VR með afar umdeildum hætti. Stefán Einar var þá formaður félagsins og hún ástkona hans. Hún lögsótti DV vegna frétta um málið en tapaði fyrir Hæstarétti. Sara var látin fara frá VR eftir að Stefán Einar var felldur af stóli formanns. Hún lögsótti þá félagið fyrir einelti og ólögmæta uppsögn en tapaði því máli einnig.
Forveri Söru Lindar, Björgvin Víkingsson, lét af störfum sem forstjóri um síðustu mánaðamót til að verað innkaupastjóri Bónuss. Hann er með meistaragráðu í aðfangakeðjustjórnun frá ETH háskólanum í Zürich og B.Sc. gráðu í umhverfis- og byggingaverkfræði frá Háskóla Íslands. Hann hefur kennt vörustjórnun og stefnumarkandi innkaup við Háskólann í Reykjavík.
Mannlíf sendi fyrirspurn á upplýsingafulltrúa Ríkiskaupa um ráðninguna og fékk eftirfarandi svör: „Forstjóri Ríkiskaupa óskaði eftir að láta af störfum. Í stað hans var Sara Lind Guðbergsdóttir, sem var staðgengill forstjóra, settur tímabundið forstjóri frá 1. apríl – 31. ágúst. Gert er ráð fyrir að staðan verði auglýst innan tíðar.“
Ráðherra vantreyst
Í frétt Hringbrautar segir að greinilegt sé að mikið vantraust ríki gagnvart fjármálaráðherra, bæði meðal stjórnarandstöðu og stjórnarliða. Segir í greininni að margir telji að Bjarni Benediktsson laumað Söru Lind í stöðu forstjóra Ríkiskaupa án auglýsingar og ætli sér að skipa hana formlega síðar í sumar að undangenginni auglýsingu. Bandamenn Bjarna eru sagðir hafa lýst þeirri skoðun við Hringbraut að þeir hafi ekki trú á því að Bjarni muni ganga svo langt að skipa Söru Lind forstjóra Ríkiskaupa í ljósi þess að hana skorti menntun og reynslu á þessu sviði. Í dag sé ekki lengur boðlegt að vera með lögfræðimenntun til að setjast í feit embætti í stjórnkerfinu. Vakin er athygli á því að meðal verkefna forstjórans á næstu árum sé stærsta verkefni Íslandssögunnar, bygging nýja Landspítalans.