Mannlíf hefur nýverið fjallað um þjóðþekktan mann sem var dæmt forræði yfir einu barna sinna. Barnsmæður mannsins hafa stigið fram og sagt frá meintu grófu andlegu og líkamlegu ofbeldi auk hótana af hans hálfu.
Samkvæmt heimildum Mannlífs er maðurinn sem um ræðir Fjölnir Þorgeirsson athafnamaður.
Fjölnir á fimm börn með fimm konum og fékk hann forræði yfir einu þeirra nýverið. Samkvæmt heimildum Mannlífs hefur Fjölnir í nokkur skipti verið tilkynntur til Barnaverndar auk þess að vera kærður fyrir ofbeldi en málinu var vísað frá.
Bryndís Ásmundsdóttir er ein barnsmæðra Fjölnis og kom hún fram í viðtali hjá Eigin Konum í gær. Þar lýsir hún meintu ofbeldi og er frásögn hennar átakanleg. Í kjölfarið hafa tvær aðrar barnsmæður Fjölnis stigið fram og lýst yfir stuðningi við Bryndísi og hafa sömu sögu að segja.
Fjallaði Mannlíf um Guðrúnu Ágústu Ágústsdóttur þerapista sem vitnaði fyrir dómi í forræðismálinu. Guðrún hefur orðið fyrir töluverðri gagnrýni á samfélagsmiðlum síðustu daga vegna meintra trúnaðarbrota í starfi og hefur hlutleysi, fagmennska hennar verið dregin í efa. Þá hefur verið vakin athygli á því að hún hafi nýverið borið vitni í forsjásmálinu og frásögn hennar talin hafa haft áhrif á niðurstöðu dómsins. Í viðtali við Mannlíf sagðist Guðrún meðal annars vinna hjá Barnavernd en fékk blaðamaður staðfestingu á því að hún væri ekki starfsmaður þar.
Þá hefur Líf án ofbeldis greint frá því að tvær barnsmæður Fjölnis stóðu með frásögn Bryndísar í forræðismálinu en alfarið hafi verið litið framhjá því.
Ekki náðist í Fjölni við vinnslu fréttar þrátt fyrir ítrekaðar tilraunir.