Einar Valur Kristjánsson, framkvæmdastjóri Hraðfrystihússins Gunnvarar, segist miður sín yfir því að ekki hafi verið farið eftir reglum þegar frystitogaranum Júlíusi Geirmundssyni var ekki snúið til hafnar þrátt fyrir fjölmörg covid-smit um borð. Hvort skipverjum verði bætt atvikið hefur ekki verið rætt.
„Þetta eru bara mistök af okkar hálfu og við erum að biðjast velvirðingar á þeim, innilega. Það er enginn afsláttur af því. Okkur þykir þetta mjög miður; ömurlegt alveg, sagði Einar Valur í samtali við Morgunblaðið þar sem hann segir vinnu í gangi við að fara yfir alla atburðarrásina. Í viðtali við Vísi um helgina bar hann því meðal annars við að stjórnendur fyrirtækisins hafi ekki „þekkt“ Covid-19. „Fyrirtækið telur ljóst að rétt hefði verið að tilkynna grun um kórónuveiru um borð í skipinu til Landhelgisgæslunnar og láta þeim yfirvöldum eftir að meta hvort rétt væri að sigla skipinu til hafnar.“
Forsvarsmenn Hraðfrystihússins Gunnvarar, sem gerir út togarann Júlíus Geirmundsson ÍS, voru ítrekað hvattir til að halda með skipið í land í Covid-sýnatöku. Þau tilmæli bárust frá umdæmislækni sóttvarna á Vestfjörðum, Súsönnu Björgu Ástvaldsdóttur, meðal annars á þriðja degi túrsins, en þau tilmæli voru virt að vettugi.
Útgerðin sendi hins vegar frá sér yfirlýsingu þar sem það sagði að í ljósi þeirrar vitneskju sem nú liggur fyrir hefði átt að kalla skipið fyrr til hafnar. Fyrirtækið lét líka í það skína að það hafi verið ákvörðun annarra að ekki hafi verið ástæða til að halda með skipið til hafnar snemma í túrnum. Súsanna sagði í samtali við Mannlíf það hins vegar kýrskýrt að hún hvatti útgerðina alveg frá upphafi að fara með skipverja í sýnatöku. Það hafi hún gert ítrekað á meðan túrnum stóð.
„Þetta var ekki mín ákvörðun og þetta hefði getað farið verr. Mín tilmæli hafa verið, og verða alltaf, alveg sama hvar þú ert staddur í heiminum, að þú eigir að koma í sýnatöku ef þú ert með einkenni. Ég get staðfest að þau samskipti áttu sér stað milli mín og útgerðarinnar, þar af mjög snemma í túrnum. Tilmæli mín eru mjög einföld,“ sagði Súsanna.
Útgerðin virðist sek um að hafa stofnað mannslífum í hættu með því að halda sjó þrátt fyrir að stærstur hluti áhafnarinnar hafi verið veikur. Þrátt fyrir endurtekin tilmæli sóttvarnayfirvalda hélt skipstjórinn ekki til hafnar til að láta skima fyrir veirunni og kom hinum sjúku í skjól. Þvert á móti var haldið áfram í túrnum með þeim afleiðingum að nánast allir úr áhöfninni veiktust. Skipið hélt loks til hafnar, rúmum tveimur vikum eftir að veikindin hófust til að taka olíu.
Á endanum voru 22 af 25 manna úr áhöfn frystitogarans sýktir af Covid. Nokkrir áhafnarmeðlimir frystitogarans héldu í Covid-einangrun í skólabyggingu að Holti í Önundarfirði í gær. Þar var áður prestsetur. Fram hafa komið lýsingar úr túrnum þar sem því er haldið fram að útgerðin hafi neytt Covid-veika menn að vinna. Arnar Hilmarsson háseti var einn þeirra sem rauf þögnina um hvað raunverulega gerðist á skipinu.
Þór Ólafur Helgason, yfirvélstjóri á togaranum, steig þá fram og kannast ekki við lýsingar á því að skipverjar sem voru veikir af Covid-19 hafi verið skikkaðir til að vinna um borð. Það gerði hann í samtali við Vísi. Þá segist hann ekki hafa orðið var við að margir úr áhöfninni hafi orðið fárveikir og fullyrti að Arnar háseti væri ekki að segja satt og rétt frá.
Sveinn Geir Arnarsson skipstjóri vildi ekki tjá sig um málið við Mannlíf þrátt fyrir ítrekaðar tilraunir.