Frosti Logason fjölmiðlamaður hætti störfum hjá fjölmiðlafyrirtækinu Sýn og sagði sig úr stjórn Blaðamannafélags Íslands eftir að Edda Pétursdóttir, fyrrverandi kærasta hans, steig fram í þætti Eddu Falak og sakaði hann um að hafa beitt sig andlegu ofbeldi fyrir rúmum áratug. Sagði hún að Frosti hefði hótað að birta viðkvæm myndbönd af henni opinberlega. Frosti gekkst við hluta ásakananna og baðst afsökunar á framferði sínu en Edda tók það ekki til greina og hafnaði öllum sáttaumleitunum. Frá því að upp úr hinu eitraða sambandi slitnaði fyrir áratug hefur Frosti farið í meðferð, ræktað edrúmennsku sína og stofnað fjölskyldu. Hann var á framabraut innan Sýnar þegar hann vék úr starfi vegna málsins og fór á sjóinn.
Í framhaldi af sjómennskunni stofnaði hann hlaðvarpsveituna Brotkast. Í þætti sínum, Harmageddon, fletti hann ofan af blekkingum Eddu Falak sem varð til þess að þáttur hennar var lagður niður. Hann segir Eddu Falak hafa dylgjað um að hann sé nauðgari.
Frosti fjallar ítarlega um slaufunina í einkaviðtali í podcastinu Mannlífinu og lýsir atburðarásinni fyrir 10 árum þegar upp úr sambandi hans og Eddu Pétursdóttur slitnaði. Viðtalið birtist á tv.mannlif.is kl. 20 í kvöld. Þetta er í eitt fyrsta sinn sem einhver þeirra sem hefur verið slaufað stígur fram og segir sína hlið mála.