Töluverð umræða hefur verið um ferð Hannesar Þórs Halldórssonar landsliðsmarkvarðar í brúðkaup landsliðsfélaga síns á Ítalíu, en Halldór Auðar Svansson fyrrum borgarfulltrúi Pírata er með forvitnilega sýn á málið.
Halldór rifjar upp á Facebook hvernig sumir hendi því jafnvel fram að Hannes hafi gert sér upp meiðslin og það minnir hann óneitanlega á aðra umræðu.
„Mér finnst þetta vera bara nákvæmlega sama umræðan og blossar stundum upp um öryrkja og langveikt fólk, verið er að vakta það hvað fólk gerir, tortryggja og setja sig í dómarastöðu gagnvart því hvað sé eðlilegt að fólk geri eða geti gert,“ segir Halldór og bætir við:
„Staðreyndin er hins vegar sú að veikt fólk á mjög misjafna daga og veikindi sem hindra til dæmis atvinnuþátttöku aftra ekki alltaf fólki frá því að skreppa við og við út á lífið eða jafnvel í ferðir til útlanda. Rétt eins og meiðsli Hannesar geta algjörlega aftrað honum frá því að spila fótbolta – en ekki frá því að skreppa í brúðkaup. Lexían er að slaka aðeins á gagnvart því að telja sig vita betur en annað fólk hvað það getur og getur ekki.“