BAFTA-verðlaunahátíðin, bresku kvikmyndaverðlaunin, fór fram í 73. sinn í gær í Royal Albert Hall í London í Bretlandi. Skipuleggjendur hátíðarinnar lögðu mikla áherslu á að fara umhverfisvænar leiðir í hátíðarhöldunum og hvöttu þess vegna gesti til að mæta í notuðum fötum á hátíðina í stað þess að kaupa ný föt.
Gestir BAFTA fengu leiðarvísir fyrir hátíðina sem nemendur við London Collega of Fashion útbjuggu. Í leiðarvísinum eru gestir beðnir um að klæðast einhverju sem þeir eiga nú þegar inni í fataskáp eða fá föt lánuð eða leigð í stað þess að kaupa ný föt og draga þannig úr kolefnisspori. Þessu er sagt frá á Independent.
Í leiðarvísinum sem um ræðir var þá að finna lista yfir fataleigur á borð við Hurr Collective, By Rotation og My Wardrobe. Í leiðarvísinum var einnig að finna lista yfir fatahönnuði sem nota umhverfisvæn efni í hönnun sína.
Þessi boðskapur BAFTA virðist hafa lagst vel í gesti. Sjónvarpskonan Laura Whitmore hrósaði t.d. skipuleggjendum hátíðarinnar fyrir framtakið á Instagram og birti í leiðinni nokkrar myndir af sér í fötum sem hún hefur fengið að láni fyrir BAFTA í gegnum árin.