Guðjón Valdimarsson lét skína í klærnar og skipaði tveimur Írökum að hunskast heim til sín í vikunni. Viðkomandi höfðu óskað eftir aðstoð við að finna vinnu hér á landi inni á fjölmennum hópi á Facebook en Guðjóni virðist ekki hafa litist vel á þá hugmynd. Hann er faðir Sigríðar Bjarkar ríkislögreglustjóra.
Auglýsing Írakanna var sett inn í hópinn Gefins, allt gefins á Facebook en eftir að fjörugar, og á köflum rasískar umræður sköpuðust undir þræðinum hvarf hann síðar af síðunni. Auglýsingin hljóðaði svona:
„Hæ, við erum tvær manneskjur frá Írak. Og við þurfum að vinna hér. VIð getum talað arabísku, ensku og tyrknesku. Getur einhver hjálpað okkur að finna vinnu?“
Guðjón var einn þeirra sem skellti inn ummælum undir færsluna. „Farið heim til ykkar,“ sagði Guðjón sem sjálfur rekur vopnasölu á netinu.
Ekki voru allir hrifnir að innleggi Guðjóns og annarra sem voru á svipuðum nótum. Ástrós nokkur var ein þeirra. „Eitthvað held ég að Sigríður Björk dóttir þín, a.k.a. Ríkislögreglustjóri, verði fyrir vonbrigðum með þetta innslag frá þér Guðjón. Maður velur sér víst ekki foreldra en batnandi mönnum er best að lifa,“ segir Ástrós.
Í samtali við Mannlíf gengst Guðjón við orðum sínum án þess að vilja gera of mikið úr merkingu þeirra. Hann segist hafa fulla rétt á sínum skoðunum og það hafi fokið í hann þegar hann sá auglýsinguna. „Það bara fauk í mig, það er allt og sumt. Ef ég hef þessa skoðun þá er það ekki í lagi en aðrir geta sagt það sem þeim sýnist, á meðan þeir eru góða fólkið. Ég bara hlýt að hafa sama rétt og allir aðrir að hafa mína skoðun á hlutunum. Það er ekkert meira um það að segja. Mín skoðun hlýtur að vera jafngild og allra annarra. Það virðist vera svoleiðis að það eru bara sumir hópar sem mega segja sína skoðun. Aðrir eru ekki nægir,“ segir Guðjón.