- Auglýsing -
Guðmundur Jón Sigurðsson bifreiðastjóri er látinn, 64 ára að aldri. Hann lést í faðmi fjölskyldu sinnar aðfaranótt miðvikudagsins 2. ágúst eftir baráttu við krabbamein.
Guðmundur Jón fæddist í Reykjavík 1. mars 1959, sonur hjónanna Sigurðar Sigurdórssonar og Sigríðar Erlu Ragnarsdóttur sem lést árið 2022. Sigurður lifir son sinn.
Börn Guðmundar og Guðríðar Ólafíu Kristinsdóttur eru 1)Alma Dögg, f. 27 ágúst 1991, maður hennar er Arnar Helgi Ágústsson. Dóttir þeirra er Ólafía Eik, f. 4. október 2022. 2) Sindri Rafn f. 28 febrúar 1994. Kona hans er Estefania Villegas Muñoz.
Guðmundur Jón ólst upp á Flateyri og bjó þar til ársins 1996 þegar fjölskyldan flutti til Reykjavíkur. Hann starfaði lengst af sem bifreiðastjóri. Um tíma var hann formaður Verkalýðsfélagsins Skjaldar. Þá var hann fréttaritari DV um árabil. Seinna annaðist hann ættfræðiskrif blaðsins. Hann var einstaklega lipur penni og skilaði verkum sínum af alúð. Guðmundur Jón skrifaði viðtalsgreinar fyrir Mannlíf af sömu alúð.
Mannlíf þakkar honum órofa vináttu, samstarf og stuðning og vottar ættingjum hans dýpstu samúð.
Guðmundur verður jarðsunginn frá Bústaðakirkju á föstudaginn 11 ágúst kl. 13.