- Auglýsing -
Gunnar Smári Egilsson, forsprakki Sósíalistaflokksins, segir að miðað við undirritaða samninga í dag náist aðeins að bólusetja öryrkja og þá sem eru 60 ára og eldri fyrir árslok 2021.
Sú sé einfaldlega raunin miðað við Pfizwer-samninginn en myndin kunni að breytast þegar afhent verður síðla sumars samkvæmt stærsta samningnum sem fyrirhugaður er. Gunnar Smári bendir á að það verði ekki fyrr en á þriðja ársfjörðungi sem bóluefni fari fyrst almennilega að streyma til landsins.
Gunnar Smári stofnar til umræðu um bóluefnisskortinn á spjallsvæði Sósíalistaflokksins. „10 þúsund skammtar af bóluefni duga til að gera fimm þúsund manns ónæm fyrir kórónaveirunni. Það er ívið færri en hafa smitast og yfirunnið sjúkdóminn, en í dag eru það 5555. Gert er ráð fyrir að um þúsund starfsmenn heilbrigðiskerfisins verði bólusettir og restin fari í að bólusetja elsta fólkið. Á landinu eru um 2.230 90 ára og eldri, svo ætla má að þessi sending nái til fólk niður að fólki sem er rúmlega 87 ára gamalt,“ segir Gunnar Smári og heldur áfram:
„Í kjölfarið koma um þrjú þúsund skammtar á viku, sem duga til að bólusetja 1500 manns. Ef farið verður eftir aldri má reikna með að búið verði að bólusetja fólk 80 ára og eldra í annarri viku febrúar, fólk sem er 70 ára og eldra um miðjan maí og fólk sem er 60 ára og eldra fyrstu vikuna í október.“
Í spjallinu er bent á að samningurinn við Pfizwer sé alls ekki eini samningurinn sem íslenska ríkið komi til með að undirrita varðandi bóluefni. Gunnar Smári segir það vissulega rétt en að samkvæmt þeim stærsta verði ekki afhent fyrr en síðla árs. „Líklega verður ekki aðeins farið eftir aldursröð heldur verður fólk með undirliggjandi sjúkdóma bólusett án tillits til aldurs. Ætla má að öryrkjar yngri en 60 ára séu um 13 þúsund. Með samningnum við Pfizwer tæki það fram í desember 2021 að bólusetja alla öryrkja og fólk sextíu ára og eldra,“ segir Gunnar Smári.