Nú um áramótin taka gildi ný umferðarlög sem samþykkt voru á Alþingi í júní sl. Að því tilefni hafa allar helstu breytingar á umferðarlögum verið teknar saman á vef Samgöngustofu.
Í nýju ákvæði er sérstaklega gert ráð fyrir því að neita megi þeim um ökuskírteini sem háður er notkun áfengis. Í gildandi lögum er tekið fram að neita megi þeim um ökuskírteini sem er háður ávana- fíkniefnum og öðrum sljóvgandi efnum.
„Neita má þeim um ökuskírteini sem háður er notkun ávana- og fíkniefna, áfengis eða annarra sljóvgandi efna. Bera má ákvörðun um þetta undir dómstóla samkvæmt reglum 68. gr. a almennra hegningarlaga,“ segir í ákvæðinu.
Úr 0,5 prómill í 0,2 prómill
Í nýju lögunum telst ökumaður ekki geta stjórnað ökutæki örugglega ef vínandamagn mælist 0,2 prómill í blóði hans. Hlutlægu mörkin sem segja til um það hvort ökumaður geti stjórnað ökutæki örugglega eru því lækkuð úr 0,5 prómill í 0,2 prómill.
Refsimörk verða þó áfram miðuð við 0,5 prómill og verður ökumönnum því ekki gerð refsing nema áfengi í blóði mælist yfir 0,5 prómill.
Samantekt á helstu nýmælum nýju umferðalaganna má sjá á vef Samgöngustofu.