Hallgrímur Helgason, rithöfundur og myndlistarmaður, sló fram skemmtilegri hugmynd á Facebook-síðu sinni í dag: „Hugmynd í Kófinu, um leið og Víðir leyfir: Hafa Leifsstöð opna fyrir burtþyrstan landann, og leyfa honum að spranga um salina, láta leita á sér, taka einn öllara, spjalla og skella sér svo í Fríhöfnina,“ segir rithöfundurinn vinsæli og þróar síðan hugmyndina áfram: „Vopnaleitinni yrði breytt í lottó, allir fengju miða í vasann við innganginn og einn af hverjum þúsund miðum myndi svo bípa í hliðinu við mikinn fögnuð,“ stingur hann upp á.
Hugmyndaauðgi Hallgríms eru engin takmörk sett og rekur hver uppástungan aðra í færslu hans um þessa gleðistund landans í Leifsstöð: „Á fimmtudögum væri svo menningarveisla, tónleikar og upplestrar. Það er reynsla mín að Íslendingum finnst í raun fallegasti staður landsins vera Leifsstöð, þar líður þeim best, enda sést það, við erum alltaf svo glöð þar. Þar er fólk annaðhvort að koma heim til landsins sem það elskar eða fara burt frá landinu sem það hatar. Held að fólk langi alltaf í Leifsstöð, líka þótt engin séu flugin,“ segir hann.
Þetta uppátæki gæti líka bjargað kiljumarkaðnum og rútufyrirtækjunum að mati Hallgríms: „Svo er þetta allt saman atvinnuskapandi og íslenska kiljumarkaðnum yrði bjargað. Þetta myndi að auki redda rútufyrirtækjunum því enginn gæti ekið heim…“ heldur hann fram.
Og ekki nóg með það, hann er líka komin með nafn á gleðskapinn: Lukkustund í Leifsstöð. Varla þarf að draga í efa að fólk myndi flykkjast á Lukkustund í Leifsstöð ef hugmynd rithöfundarins yrði að veruleika.
Færslu Hallgríms má lesa í heild hér: