Í gærkvöld landaði varðskipið Týr miklu magni af rusli á Ísafirði. Það er hópurinn Hreinar Hornstrandir sem hefur safnað draslinu saman úr fjörum Kögurvíkur og Hælavíkur.
Blaðamaður gat ekki betur séð en að ruslið væri allt úrgangur frá sjávarútvegi. Vegfarandi sem átti leið um bryggjuna hafði orð á því að þeir sem hefðu mesta hagsmuni af hafinu gengu svona um það.
Mynd: Guðmundur Sigurðsson.
„Þetta er ekki eftir fólkið sem kaupir innkaupapoka í búðinni,“ sagði hann miður sín yfir umgengninni.
Gígja Vilhjálmsdóttir, háseti á Tý, notaði Kvennafrídaginn í að koma ruslinu úr fjörum í víkum norður og til Ísafjarðar ásamt skipverjum á Tý.
„Þetta er rosalegt, allt þetta drasl er bara úr tveimur víkum. Ég veit ekki hvað er mikið eftir, við sjáum bara um að flytja ruslið frá hreinsunarfólkinu og koma því til Ísafjarðar. Hreinsunarflokkurinn Hreinar Hornstrandir er að gera kraftaverk í fjörunum þarna norðurfrá,“ segir þessi knáa skipverja sem stóð í stórræðum við að landa því sem aðrir henda.