Minnstu mátti muna að stórslys hefði orðið þegar vörubíl með tengivagn frá Samskipum var ekið í framúrakstri milli Borgarness og Munaðarness laust eftir klukkan fjögur í dag.
Athæfi atvinnuökumannsins er lyginni líkast og viðbrögð myndatökumanneskjunnar leyna sér ekki: „Ómægod, Ómægod – Fáviti!“
Vörubíl Samskipa var ekið á öfugum vegar helmingi en snarræði ökumanna tveggja bíla spornuðu við að hörmungarslys hefði orðið, annars vegar ökumanni bíls úr mótstæðri átt og hins vegar ökumanni bíls sem nauðbeyður veitti vörubílnum pláss á réttum vegarhelmingi. Arna Sjöfn Ævarsdóttir var farþegi í bifreið sem ökumaður Samskipa hafði tekið fram úr og náði hún myndskeiði af athæfinu.
„Við sáum hann fyrir aftan okkur reyna og reyna að færa sig um akrein til þess að taka fram úr. Sáum við bílinn koma á móti en skil ég ekki hvers vegna hann sá bílinn ekki þar sem hann var á margfalt stærri bíl,“ skrifar Arna Sjöfn í Facebookfærslu.
Arna Sjöfn tekur jafnframt fram að umferðarhraði hafi verið ágætur og þau verið á um 80 kílómetra hraða á klukkustund en hámarkshraði á svæðinu hafi verið 90. Af myndskeiðinu að dæma voru veðurskilyrði mjög góð.
„Vorkenni ég virkilega fólkinu sem kom keyrandi á móti manninum sem rétt náði að skjóta sér frá og einnig þeim sem voru fyrir framan okkur á rauða bílnum sem var þrýst í það að sveigja sér næstum því útaf veginum til þess að bjarga sér frá stórskaða.“
Ekki náðist samband við Samskip við vinnslu fréttarinnar en leitað verður viðbragða frá fyrirtækinu.
Hér að neðan má sjá færslu Örnu Sjafnar Ævarsdóttur í heild: