Það er alltaf ánægjulegt fyrir neytendur og samfélagið þegar nýjar íslenskar vörur koma á markað. Ekki er verra ef það er lífrænt, hollt og gott. Fyrir ekki svo löngu kom Bopp í verslanir en það eru poppaðar byggflögur sem Havarí framleiðir.
Á Karlsstöðum í Berufirði búa hjónin Berglind Häsler og Svavar Pétur Eysteinsson ásamt börnum. Þar starfrækja þau gistiheimili, tónleikastað, matstofu, snakkgerð og menningarstarfsemi undir merki Havarí og er Bopp á meðal þess sem þau framleiða.
Verðlaunasnakk
Í nóvember síðastliðnum voru verðlaun veitt í Íslandsmeistarakeppninni í matarhandverki. Askurinn, en svo heita verðlaunin, var þá afhentur og fékk Bopp gullverðlaun í flokki nýsköpunar. Aðrar vörur sem fengu verðlaun í þeim flokki voru Söl snakk frá Bjargarsteini mathúsi og saltkaramellusíróp frá Urta Islandica ehf.
Það má af þessu sjá að íslenskt hugvit skilar sér í formi spennandi afurða til neytenda.