Heiðar Jónsson snyrtir hvetur miðaldra konur til að hætta að lita á sér hárið og halda áfram að farða sig. Þá sé konum mikilvægt að klæðast þeim litum sem falla að hörundinu.
Í viðtali við Lifðu núna veitir hann konum á miðjum aldri ýmis dýrmæt ráð. Sjálfur hefur hann áratuga reynslu þegar kemur að klæðaburði og förðun. Heiðar er sjálfur kominn á lífeyrisaldur og farinn að velta meira fyrir sér förðun eldri kvenna. Hann segir að litaval skipti sköpum.
„Það er mín skoðun að fólk eigi að nota sömu liti í förðun og það gerði þegar það var að byrja að farða sig, burtséð frá aldri. Það er spurning hvort fólkið með heita litarháttinn heldur áfram að lita hárið og þá með gylltum tónum þegar það eldist. Vigdís Finnbogadóttir er gott dæmi um konu sem hefur gert það mjög fallega. Við erum svo með mörg dæmi um fólk úr fjölmiðlum og stjórnmálum sem litar á sér hárið, vegna þess að það er með heitan litarhátt,“ segir Heiðar.
Heiðar bendir á að hópur miðalra og eldri kvenna fari sífellt stækkandi og úrvalið frá snyrtivörufyrirtækjunum taki mið af því. „Við sem erum komin yfir sjötugt erum stór neytendahópur og erum tilraunadýr okkar sjálfra í því hvernig við eigum að haga okkur og hvernig við eigum að vera þegar við eldumst. Ég vil endilega benda konum á að kíkja á nýjar línur fyrir koknur 65 ára og eldri, vegna þess að þetta eru allt snyrtivörur sem „ljóma“. Þær eru ekki búnar til úr efnum sem „yngja“ konur, heldur úr efnum sem enn eru til staðar í líkamanum þegar þær eldast. Þau valda því að það er eins og það komi æskuljómi í húðina, án þess að hrukkurnar minnki,“ segir Heiðar og heldur áfram:
„Það fylgir aldrinum að við fáum ýmsa litla galla sem við viljum ekki að sjáist og ef við notum ekki rétta liti þá dregur förðunin þá fram, á sama hátt og fatnaður sem passar fólki ekki undirstrikar galla frekar en kosti viðkomandi. Konur setja oft á varirnar á sér lit sem þeim finnst ógurlega fallegur, en lit sem þær myndu aldrei fara í. Það eru óskaplega margar konur með bleikan varalit, en svo eiga þær enga bleika flík. Ef kona hefur verið í brúnum litatónum er rétt að hún haldi sig við þá. Ég segi, þið skuluð halda áfram að farða ykkur og vera í litum sem falla að hörundinu“.