Forstjóri Íslenskrar erfðagreiningar segir að helmingslíkur séu á því að kórónaveira sé komin um allt á Íslandi í ljósi fregna af smitum sem komu upp á Rey Cup fótboltamótinu í Laugardal um síðustu helgi. Hann vill að gripið verði til harðari aðgerða til að hefta útbreiðslu veirunnar áður en skólar hefjast.
„Ástæðan fyrir því að við ætlum að rjúka af stað á morgun og fara að skima í samfélaginu almennt er sú að þetta lítur þannig út, frá mínum bæjardyrum séð, að það eru svona helmingslíkur á því að þetta er búið að fara út um allt annars vegar og hins vegar að þetta sé bara bundið við þessa fáu hópa.“
Þetta segir Kári Stefánsson, forstjóri Íslenskrar erfðagreiningar, í samtali við Fréttablaðið. Segir hann mikilvægt að hefta úbtreiðslu kórónaveirunnar áður en skólar hefjast eftir þrjár vikur. „Við verðum að koma blessuðu börnunum í skólann. Þannig við ætlum að búa okkur undir það versta og vona það besta. Við ætlum að leggja okkur fram eins og við getum við að skima í slembiúrtaki úr samfélaginu og skima í kringum þetta fólk sem hefur smitast.“
Hann segir viðbúið að aðilar innan ferðaþjónustunnar kveinki sér ef landamærunum verður lokað aftur tímabundið. Það sé ferðaþjónustinni hins vegar fyrir bestu. Ef ekki er gripið til aðgerða núna sé viðbúið að loka þurfi landinu til lengri tíma.
Íslensk erfðagreining mun, að eigin frumkvæði, byrja að skima aftur fyrir veirunni núna í morgunsárið. Að sögn Kára ætlar fyrirtækið að leggja sitt að mörkum svo „þetta náist aftur á sinn stað.“