- Auglýsing -
Þórólfur Guðnason, sóttvarnarlæknir, er hissa á öllum þeim beiðnum sem berast til yfirvalda um undanþágu frá sóttkví og samkomubanni. Hann lýsti yfir furðu sinni á upplýsingafundi almannavarnadeildar ríkislögreglustjóra í dag.
Þórólfur minnti á að sá árangur sem hefur náðst í að draga úr útbreiðslu kórónaveirunnar byggist á þeim aðgerðum sem yfirvöld hafa gripið til, þar á meðal samkomubanni.
Hann segir því ólógískt að veita undanþágur og hvetur fólk til að sýna því skilning.
„Þetta mun reyna á úthald allra,“ sagði Þórólfur og minnti aftur á að fólk sé í langhlaupi. „Við erum kannski hálfnuð í þessu, um það bil, þó það sé erfitt að setja tímamörk.“
Þórólfur biður fólk um að reyna að halda í jákvæðnina þrátt fyrir ástandið.