Uppnám varð í fjölbýlishúsi þegar óvelkominn gestur barði allt að utan í þeim augljósa tilgangi að komast inn. Óttasleginn íbúi hafði samband við lögreglu og leitaði hjálpar. Hann sagðist ekki þekkja dólginn. Þegar lögregla var á leið á vettvang hafði íbúinn samband og upplýsti að maðurinn væri búinn að brjóta sér leið inn á sameign hússins. Lögreglan stóð manninn að verki og handtók hann á vettvangi. Húsbrjóturinn reyndist vera undir miklum áhrifum fíknefna. Hann var læstur inni í fangaklefa og verður yfirheyrður þegar víman rennur af honum.
Lögregla og slökkvilið kom til aðstoðar þar sem bíll var brennandi. Slökkt var í bifreiðinni á vettvangi . Hún reyndist vera óökufær og var flutt með dráttarbifreið af vettvangi.
Einn búðaþjófur var gripinn í gærkvöld. Mál ghans var afgreitt samkvæmt venju.
Ofbeldisseggur var með ógnandi tilburði við vegfarendur í miðborginni. Lögreglu bárust tvært tilkynningar um háttsemi mannsins og hélt þegar á vettvang. Þegar lögregla hafði upp á aðilanum kom í ljós að um góðkunninga lögreglunnar var að ræða. Ógnvaldurinn var ljúfur sem lamb við lögregluna. Vel gekk að ræða við hann og urðu þau málalok að hann þáði far heim til sín.
Lögreglu barst tilkynning um brothljóð frá Rimaskóla. Í ljós kom að búið er að brjóta margar rúður í skólanum. Skemmdarvargarnir höfðu einnig valdið tjóni inni í skólanum.
Þrír ökumenn voru stöðvaðir í akstri grunaðir um að vera undir áhrifum fíkniefna. Dregið var úr þeim blóð og þeir svo látnir lausir.