Útlit er fyrir að leikkonan Lashana Lynch muni taka við dulnefninu 007 í næstu James Bond-kvikmynd.
Aðdáendur myndanna um breska njósnarann James Bond ættu kannski að leggja nafnið Lashana Lynch á minnið því samkvæmt heimildum The Guardian mun hún taka við númeri James Bond, 007, í næstu Bond-mynd, þeirri 25 í röðinni. Hún mun þó ekki fara með hlutverk James Bond heldur taka við dulnefni hans þegar Bond sest í helgan stein.
Lashana Lynch heitir fullu nafni Lashana Rasheda Lynch. Hún er bresk, fædd í London í nóvember árið 1987. Lashana á rætur sínar að rekja til Jamaíka en er uppalin í London.
Hún er útskrifuð frá Arts Educational Schools í London með bakkalárgráðu í leiklist.
Hún kom fyrst almennilega fram á sjónarsviðið í leiklistarheiminum þegar hún lék í kvikmyndinni Fast Girls árið 2012. Áður hafði hún farið með lítið hlutverk í þáttunum The Bill.
Síðan þá hefur Lashana leikið í ýmsum þáttum og kvikmyndum, til dæmis fór hún með hlutverk í nýju ofurhetjumyndinni Captain Marvel.
Nýjasta Bond-myndin kemur út snemma á næsta ári.