IKEA í Bretlandi hefur gefið út mjög stranga reglugerð sem viðskiptavinir verða að fylgja vilji þeir versla í verslunum stórfyrirtækisins þegar þær verða opnaðar að nýju eftir útgöngubann í byrjun júní. Einungis einn fullorðinn og eitt barn úr hverri fjölskyldu fá að fara inn í verslanirnar í einu.
Í reglugerð verslunarinnar kemur jafnframt fram að verðir munu sjá til þess að viðskiptavinir virði tveggja metra regluna og að veitingahús verslananna og barnaleiksvæði verði lokuð. Fjöldi viðskiptavina sem fá að vera inni í verslununum á sama tíma verður mjög takmarkaður og í reglugerðinni er fólk hvatt til þess að koma með tilbúna innkaupalista og eigin burðarpoka til að flýta fyrir streyminu í gegnum verslanirnar.
Einungis verður tekið við greiðslum með snertilausum debit- eða kreditkortum eða snertilausum símagreiðslum.