„Til okkar komu yfir 400 manns rétt er það, en að allur þessi fjöldi hafi verið samankominn á sama tíma er fráleitt og bara alls ekki rétt,“ segir Inga Sæland, formaður Flokks fólksins. Fréttatíminn birti í dag grein um Ingu þar sem ýjað er að því Inga hafi gerst sek um brot á sóttvarnarlögum þann 17. júní þegar flokkurinn bauð fólki að koma og fagna með sér og þiggja hamborgara sem sjálfur Tommi steikti ofan í gestina.
Fréttin byggir á því að Inga hafi sagt frá því, þegar hún var gestur hjá Útvarpi Sögu þann 23. júní síðastliðinn, að ríflega 400 manns hefðu sótt viðburð hjá Flokki fólksins. Inga lét eftirfarandi ummæli falla í þættinum: „Við grilluðum með Tomma á 17. júní, þetta var engu líkt það komu vel yfir 400 manns á tímabilinu þarna frá tvö til fjögur og sóttu okkur heim og grillaðir jafn margir borgarar af Tomma sjálfum“. Hér má hlusta á téðan þátt.
Í Fréttatímanum var því meðal annars vellt upp hvort hún muni nú ekki segja af sér fyrst henni hafi fundist að Bjarni Benediktsson hefði átt að gera það vegna atviksins í Ásmundarsafni á Þorláksmessu 2020.
Mannlíf ræddi við Ingu Sæland. Hún sagði að þetta væri rógburður hjá miðlinum. Viðburðurinn hafi staðið yfir í nokkrar klukkustundir og dreifst vel úr þeim góða hópi sem heiðrað hafi flokkinn okkur með nærveru sinni.
„Það var vel passað upp á sóttvarnir eins og við gerum alltaf og það ætti nú alls ekki að koma á óvart því ég hef barist fyrir einmitt því að vernda fólk fyrir vírusnum, sagði Inga. Það að fjöldi fólks hafi farið yfir 300 manns á einhverjum tímapunkti stenst ekki og því voru alls engin sóttvarnarlög brotin“.
Hún bendir á að miðillinn sé í eigu Guðlaugs Hermannssonar, sem er nýskipaður oddviti Frjálslynda lýðræðisflokksins í Suðvesturkjördæmi. Guðlaugur er náinn samstarfsmaður Guðmundar Franklíns Jónssonar, stofnanda Frjálsa lýðræðisflokksins.
