Tilkynningum um innbrot hefur fjölgað töluvert undanfarið en 997 innbrot hafa verið tilkynnt það sem af er ári 2018.
Afbrotatölfræði lögreglustjórans á höfuðborgarsvæðinu fyrir nóvembermánuð 2018 hefur verið birt. Skýrsluna má sjá á vef lögreglunnar. Í henni er að finna upplýsingar um helstu afbrot sem hafa verið tilkynnt til lögreglu á síðustu 13 mánuður. Tölur skýrslunnar eru þá bornar saman við tölur síðustu þriggja ára.
Í skýrslunni má sjá að tilkynningum um innbrot hefur fjölgað töluvert undanfarið en 997 innbrot hafa verið tilkynnt til lögreglu það sem af er ári 2018. Árið 2017 voru 816 innbrot tilkynnt og árið 2016 voru tilkynnt innbrot 792 samkvæmt skýrslunni.
Í nóvember bárust 142 tilkynningar um innbrot til lögreglu sem er óvenjumikið. Til samanburðar var tilkynnt um 101 innbrot í október. Tölurnar taka mið af innbrotum í fyrirtæki og stofnanir, heimahús, ökutæki og það sem er kallað „annað“ í skýrslunni. Hlutfallslega fjölgaði innbrotum í heimahús mest.
„Fjölgunin skýrist að einhverju leiti af fleiri tilkynningum um innbrotum í geymslur og bílskúra,“ segir á vef lögreglu.
Þess má geta að í byrjun desember varaði lögreglan á höfuðborgarsvæðinu við því að mögulega væri erlendur brotahópur kominn hingað til lands gagngert í þeim tilgangi að brjótast inn. „Af þessu tilefni biður lögreglan íbúa á höfuðborgarsvæðinu um að vera vel á verði, gæta að verðmætum, læsa vel húsum sínum og láta vita um grunsamlegar mannaferðir í síma 112,“ segir á vefnum.